Елбасы Нұрсұлтан Назарбаев Павлодар қаласының № 4 емханасына барып қайтты.

2013 жылғы 24 маусымда Мемлекет басшысы Н. Назарбаев Павлодар облысына сапары барысында Павлодар қаласының № 4 емханасына барып қайтты.

Емхананы аралау барысында Президентке «Саламатты Қазақстан» бағдарламасын өңірде іске асыру барысы туралы баяндалды, сондай-ақ заманауи емдеу жабдықтары көрсетіліп, емхананың жұмысы туралы мәлім етілді.

Мемлекет басшысы соңғы жылдары мемлекеттің денсаулық саласын дамытуға зор мән беріп отырғанын атап өтті.

– Бұл емхана «100 мектеп, 100 аурухана» бағдарламасы аясында салынды. Тағы 6 медициналық мекеменің және 4 жалпы білім беретін мектептің пайда­лануға берілуі бағдарламаның табысты жүзеге асқанын білдіреді. Сондай-ақ, қазіргі уақытта елімізде перинаталды орталықтар салынды, шала туған балаларға көмектесу үшін жаңа жабдықтармен жабдықталды. Қазақстанда жыл сайын 400 мың бала дүниеге келеді. Мемлекет оларға, сондай-ақ олар­дың отбасыларына барлық қажетті жағдай жасауда. Сонымен қатар, зей­нетақы реформасын жүргізе отырып, әйелдерге бала күтімі кезіндегі уақыты үшін зейнетақы қорына аударылымын жоғалтпауға мүмкіндік беретін механизмді қарастырдық. Бұл үшін мемлекет қосымша 10 пайыз жарна төлейтін болады, бұл қосымша әлеуметтік қолдау болып табылады, – деді Нұрсұлтан Назарбаев.

Кездесуде өңірдегі медицина қоғамдастығы өкілдері жүргізіліп отыр­ған әлеуметтік саясатқа, оның ішінде зейнетақы жүйесін жаңғыртуға қолдау білдірді. Сондай-ақ, Мемлекет басшысына қазірдің өзінде 900 операция жасап үлгерген жаңа кардиохирургиялық орталықтың қызметі туралы айтылды.

2010 жылы пайдалануға берілген Павлодар қаласындағы № 4 емхана 71 мың адамға қызмет көрсетеді, оның 16 мыңнан астамы 14 жасқа дейінгі балалар. Бұл медицина мекемесінде 391 адам жұмыс істейді.