Жоғары санатты хирург, ШЖҚ «Павлодар қаласының №1 емханасы» КМК хирургия бөлімшесінің меңгерушісі. Ғ.Сұлтанов атындағы облыстық клиникалық аурухананың жедел хирургия бойынша маманы, Павлодар қаласының бас хирург дәрігері.

 

Өмірбаяны

 

Еркін Боздақұлы Нұрғалиев 1959 жылдың 14 қазанында Павлодар облысы, Май ауданы, Абай ауылында дүниеге келген. Нұрғали Байғұрмановтың немересі. 1976 жылы Көктебе ауылында Белогор орта мектебін бітірген. 1983 жылы Семей мемлекеттік медициналық институтын тәмамдаған. 1984 жылы Ермак қалалық ауруханасында хирургия мамандығы  бойынша интернатурадан өткен. 1984 жылдан бастап 1994 жылға дейін Май орталық аудандық ауруханасында хирург дәрігер болып жұмыс істеген. 1994 жылдан бастап 2008 жылға дейін Ақсу орталық ауруханасында хирург дәрігер болып жұмыс істеді, Ақсу қаласының бас хирург дәрігері болды. Ақсу қаласында жұмыс істеген кезінде Ақсу қалалық ауруханасының хирургия бөлімшесі тәжірибесіне жаңа технологиялар енгізілді: кіші қолжетімділіктегі операция (операция из мини-доступа), эндовидеохирургия, ағзаны сақтайтын операциялар (органосохраняющие операции). Ақсу қалалық ауруханасы хирургия бөлімшесінің меңгерушісі болған кезінде Павлодар облысындағы ең үздік бөлімшелердің бірі болды. 2008 жылдан бастап Ғ.Сұлтанов атындағы облыстық клиникалық ауруханасының хирургия бөлімшесінде шұғыл көмек көрсету маманы болып жұмыс істейді, ШЖҚ «Павлодар қаласының №1 емханасы» КМК хирургия бөлімшесінің меңгерушісі болып қызмет атқарады. Павлодар қаласы бойынша ДСБ бас штаттан тыс хирург дәрігері. Жұмыс істеу барысында 9000-нан көп операция жасады. 16 ғылыми басылымның авторы. Ақсу қаласының 45 жылдығына орай Ақсу қаласының дамуына қосқан үлесі үшін мерейтойлық медальмен марапатталды. 2003, 2005, 2011, 2012, 2014, 2016 жылдары Павлодар облысы денсаулық сақтау басқармасының Құрмет грамоталарымен марапатталды.