Павлодар облыстық перинаталдық орталығы жанындағы «Салауатты ана» пансионаты акушерлік патологиясы бар және дәрігерлердің тұрақты бақылауын қажет ететін жүкті әйелдерге арналған. Мұнда негізінен облыстың шалғай ауылдарынан келген болашақ аналар орналасады.

 

Акушер-гинеколог, репродуктолог Алма Қатпинаның айтуынша, пансионатта әйелдер тегін тұрып, тамақтана алады және күн сайын дәрігерлердің бақылауынан өтеді. Пансионаттың перинаталдық орталыққа жақын орналасуы қажет болған жағдайда шұғыл медициналық көмек көрсетуге мүмкіндік береді.

 

«Көбіне бізге Павлодар облысының шалғай ауылдарынан пациенттер келеді. Олардың облыс орталығында тұратын жері бола бермейді. Мұнда барлық қажетті жағдай жасалған: ас үй, санитарлық торап, душ, жайлы төсектер, теледидар және ыдыс-аяқ бар», — деді Алма Қатпина.

 

2026 жылдың басынан бері «Салауатты ана» пансионатында 22 жүкті әйел болған.

 

Пансионатта жатқан пациенттердің бірі — Аделия Каржаубаева. Оның айтуынша, ол бұған дейін мұндай мүмкіндік бар екенін білмеген.

 

«Мен бұрын Павлодарда осындай пансионат бар екенін білмедім. Мұнда жүкті әйелдер үшін барлық жағдай жасалған. Өте ыңғайлы әрі жайлы. Дәрігерлердің жақын жерде болғаны және үнемі бақылауда болу мүмкіндігі маңызды», — деді Аделия Каржаубаева.

 

Пансионат шалғай елді мекендерден келген жүкті әйелдерге облыс орталығында тұру мәселесін шешіп қана қоймай, жүктілік кезеңінде қажетті медициналық бақылаудан уақытылы өтуге мүмкіндік береді.